Այս խնդիրի լուծման առաջին տարբերակը հրապարակվել էր որպես սեւագիր արդեն շուրջ 10 տարի առաջ։ Դրանից հետո մի քանի տարի ես չէի անդրադառնում դրան, քանի որ որոշ հանգուցային տվյալներ չէին ենթարկվում վերծանման։ 2022-ին ինձ հաջողվեց գտնել դրանց լուծումը եւ ես վերսկսեցի աշխատանքը։ Նոր տարբերակով վերականգնվող երթուղին որոշ կարեւորագույն հատվածներում տարբերվում է նախորդ վարկացից, թեեւ դրա հիմնական հետագիծը պահպանվել է։ Զուգահեռաբար գրվեց այս արշավանքի երթուղու վերականգնմանը նվիրված գիրք` Մի արշավանքի հետքերով (դեռեւս չհրապարակված) եւ երկու սեղմ շարադրանք՝ հայերեն եւ ռուսերեն։ Առաջինը զեկուցվեց նույն տարվա աշնանը ԳԱ Պատմության ինստիտուտի կազմակերպած գիտաժողովում, իսկ երկրորդը վերջերս լույս տեսավ ռուսաստանյան «Метаморфозы истории» գիտական հանդեսի 28-րդ թողարկման մեջ։
Реконструкция маршрута 8-ого (714 г. до н. э.) похода Саргона II, с опорой на топографические данные
